భాగవతము దెలిసి పలుకుట చిత్రంబు! = భాగవత గ్రంథమును పూర్తిగా అర్థముచేసికొని చెప్పుట ఆశ్చర్యము;
శూలికైనఁ = (ఆ పరమ) శివునికైన ను;
తమ్మిచూలికైన! = పద్మమునుండి పుట్టినవానికైన (అనగా బ్రహ్మకైనను);
విబుధ జనులవలన = పండితులవలన;
విన్నంత = (నేను) వినినంత;
కన్నంత = (నేను వారిదగ్గరనుండి) తెలిసికొనినంత;
తెలియ వచ్చినంత = నాకు తెలిసినంత;
తేటపఱుతు = విశదీకరించెదను (I will explain).

భాగవత గ్రంథ అనువాదమునకు ముందుగా దైవారాధన చేసి, తనకు ఏ విధముగా ఈ గ్రంథమును అనువాదము చేయవలెనని కోరిక కలిగెనో పోతనగారు చెప్పుకొనిరి. ఇది తన "పూర్వజన్మ సహస్ర సంచిత తపఃఫలమున" (1.15) కలిగిన అదృష్టమని, "సజ్జనానుమతంబున" (1.15) (పెద్దవారి అనుమతితో) ఒక చంద్రగ్రహణమునాడు గంగానది స్నానమునకు వెళ్ళి, స్నానము చేసి, "మహేశ్వర ధ్యానము" (1.15) చేయుచున్నపుడు, శ్రీ రామచంద్రుడు "కన్నుఁగవకు నెదురఁ" (1.16) కనిపించి, భాగవతమును తెలింగించిన "నీకు భవబంధములు దెగునని" (1.17) చెప్పినట్లు పోతనగారు చెప్పెను. ఆ తరువాత ఈ పై పద్యమును చెప్పెను. ఈ పద్యము మహాకవియైన పోతనగారి వినయమునకు నిదర్శనము.