నారదుడు ప్రహ్లాదుని గుణగణములను వర్ణించుచు ఇట్లనెను:

శ్రీవల్లభుఁడు = లక్ష్మీదేవి పతి / సంపదకు అధిపతి / భగవంతుడు;
తన్నుఁ జేరిన యట్లైనఁ = తన చెంతకు చేరినట్లు భావించి;
చెలికాండ్ర నెవ్వరిఁ జేర మఱచు = తన స్నేహితుల చెంతకు చేరుట మఱచును;
అసురారి దనమ్రోల నాడినయట్లైన = రాక్షసుల శత్రువు / భగవంతుడు తన ముందర ఆడుకుంటున్నట్లు భావించి;
అసుర బాలురతోడ నాడ మఱచు = రాక్షస బాలురతో ఆటలాడుట మఱచును;
భక్తవత్సలుఁడు = భక్తులయందు వాత్సల్యము గలవాడు / భగవంతుడు;
సంభాషించి నట్లైనఁ = తనతో మాట్లాడుచున్నట్లుగా భావించి;
పరభాషలకు మాఱుపలుక మఱచు = ఇతరుల పిలుపులకు పలుకుట మఱచును;
సురవంద్యుఁ = దేవతలచే పూజింపబడువాడు / భగవంతుడు;
తనలోనఁ జూచిన యట్లైనఁ = తనలో చూచుచున్నట్లు భావించి;
చొక్కి = ఆనందముతో;
సమస్తంబుఁ జూడ మఱచు = [తన చుట్టూ ఉన్న] ప్రపంచాన్ని చూచుట మఱచును;
హరిపదాంభోజయుగ జింతనామృతమున = హరి పాదపద్మముల చింతనతో కలిగిన అమృతము తో;
అంతరంగంబు నిండినట్లైన = తన అంతరంగము నిండిపోయినట్లు భావించి;
అతఁడు నిత్య పరిపూర్ణుఁ డగుచు = అతడు [ప్రహ్లాదుడు] నిత్యమూ ఆనందముతో నిండినవాడై [ఎట్టి వెలితి లేని వాడై];
అన్నియును మఱచి = అన్నింటిని [అన్ని విషయచింతనములను] మఱచి / విడనాడి;
జడత లేకయు = ఎటువంటి జడత్వము [సోమరితనము] లేకుండినను;
ఉండును జడుని భంగి = జడునివలె [సోమరివలె] కనిపించును;